تاند (شنبه، د کب/ حوت ۲۵ مه) ناسا او سپېسایکس په ګډه د جمعې په شپه فالکون ۹ راکټ په بریالیتوب د فلوریډا له کینیډي فضایي مرکز څخه فضا ته وتوغاوه چې له فضا څخه څلور ستورمزلي مځکې ته راولي.
د دې ماموریت موخه دا ده چې دوه امریکايي ستورمزلي بوچ ویلمور او سوني ویلیامز، چې نژدې نهه میاشتې یې په نړیوال فضایي تمځي (سټېشن) کې تېرې کړې دي، راستنېدو ته زمینه برابره کړي.
Four @SpaceX #Crew10 members launched at 7:03pm ET on Friday from @NASAKennedy in Florida for a science expedition aboard the International Space Station. https://t.co/R6IsMIJmkH
— International Space Station (@Space_Station) March 15, 2025
ویلمور او ویلیامز د ۲۰۲۴ کال په جون کې د بوینګ شرکت په سټارلاینر کپسول کې نړیوال فضایي تمځي ته لاړل خو د سټارلاینر په سیستم کې د تخنیکي ستونزو له امله، د دوی لومړنی اته ورځنی ماموریت وځنډېد. ناسا د لوړ خطر له امله پرېکړه وکړه چې سټارلاینر کپسول پرته له عملې ځمکې ته ستون کړي، او ویلمور او ویلیامز په تمځي کې پاتې شول.
د نوي عملې له رسېدو سره، ویلمور او ویلیامز به د راتلونکې اوونۍ په پیل کې خپل سفر ځمکې ته پیل کړي، او که هر څه سم پرمخ ولاړ شي، په فلوریډا کې به په اوبو کې راکښته شي.
د دې ماموریت په ترڅ کې به څلور نوي فضانوردان شپږ میاشتې په نړیوال فضایي تمځي کې پاتې شي، چې دا د فضایي ماموریتونو معیاري موده ده.