تاند【یکشنبه د کب ـ حوت ۱۹مه】د هرات د زنده جان ولسوالۍ یو شمېر کروندګر وايي، وحشي خوګانو یې د زغفرانو سلګونه جریبه کښتونه له منځه وړي دي.
د کروندګرو په خبره، دغه خوګان د شپې لخوا د زعفرانو کښتونو ته ورځي او وېجاړوي یې.
د دوی په خبره، وحشي خوګانو شاوخوا زر جریبه د زعفرانو کښتونو او نورو کرنیز محصولاتو ته په جدي ډول زیان رسولی دی.
بل لورته بیا هرات کې د طالبانو د حکومت د کرنې، اوبو لګولو او مالدارۍ ریاست مسوولین وايي، د خوګانو له یرغله به د زعفرانو کښتونو ساتنې په برخه کې اړین ګامونه پورته کړي.
هرات کې کروندګر د زعفرانو له درکه ښه عاید ترلاسه کوي خو کروندګر یې اندېښمن دي که دا چاره روانه وي، ښایي سږکال له زیانونو سره مخ شي.
افغانی زعفران د ښه کیفیت له امله د نړۍ په بازارونو کې هم ښه نوم لري.