تاند【یکشنبه د کب ـ حوت ۱۹مه】د طالبانو د حکومت بهرنیو چارو وزارت خبر ورکړی، چې د بهرنیو چارو سرپرست وزیر امیرخان متقي نن د عمان سلطنت د بهرنیو چارو وزیر بدر بن حمد البوسعیدي په بلنه یاد هېواد ته په رسمي سفر روان شو.
سرچینې ویلي، چې متقي به د دې سفر پر مهال د عمان بهرنیو چارو وزیر په ګډون له لوړپوړو چارواکو سره لیده کاته ولري.
سرچینې د دې سفر موخه سیاسي، اقتصادي او دوه اړخیزو اړیکو او همکاریو پر پراختیا خبرې اترې بللې ده.
یاده دې وي، چې دا په تېرو درېیو کلونو کې لومړی ځل دی، چې د طالبانو د بهرنیو چارو وزیر عمان ته په رسمي سفر ځي.
د سیاسي چارو شنونکي وایي که څه هم طالبان هڅه کوي د رسمیت پېژندنې موضوع ته لومړیتوب ورکړي، او دا ډول سفرونه تر ډېره د همدې موخې لپاره کېږي خو په باور یې دوی به هغه مهال بریالي شي چې د افغان ولس، ښځینه او نارینه حقوق ورکړي او د نړیوالو اصولو ته ژمن پاتې شي.
کابو څلور کاله کېږي چې د طالبانو حکومت تر اوسه هېڅ هېواد په رسمیت نه دی پېژندلی.