تاند【سه شنبه د کب ـ حوت ۱۴مه】په تورخم کې ځایي سرچینې وایي، تېره شپه شاوخوا ۱۰بجې یو ځل بیا د افغان او پاکستاني ملېشو ترمنځ سخته نښته شوې.
سرچینې زیاتوي چې دواړو لوریو پر یو بل د سپکو او درنو وسلو ډزې کړي دي.
د سرچینې په خبره، دا نښته پاکستاني لوري پیل کړې، چې د افغان لوري په ځوابي برید کې د پاکستان ملېشو ځیني مهمې پوستې په نښه کړي، چې درانه مالي او ځاني زیانونه یې ور اړولي دي.
دا دوهمه شپه ده چې په تورخم کې د افغانستان او پاکستان د ملېشو ترمنځ سخته نښته کېږي.
وړمه شپه هم تورخم کې د دواړو لوریو ترمنځ نښته رامنځته شوې وه چې افغان لوري ته یو طالب سرتېری وژل شوی او دوه ژوبل شوي وو.
دغه نښتې داسې مهال کېږي، چې افغان ځواکونه د ډیورڼد فرضي کرښې ته څېرمه د پوځي تاسیساتو په جوړلو بوخت دي، چې پاکستانی لوری یې د مخنیوي هڅه کوي.
د تورخم دروازه نن ۱۲مه ورځ ده، چې د هر ډول تګ راتګ پر مخ تړلې ده.