تاند【سه شنبه د کب ـ حوت ۱۴مه】د طالبانو د حکومت ویاند، ذبیح الله مجاهد رسنیو ته ویلي، د ملګرو ملتونو د استازولۍ دفتر په افغانستان کې اغېزناک نه و.
مجاهد زیاته کړې چې دغه بنسټ تل هڅه کړې، خلکو ته اندېښنې پیدا کړي او د افغانستان انځور په نړیواله کچه ناسم وښيي.
ذبیح الله مجاهد ویلي، یوناما پخپلو راپورونو کې د افغانستان د اوسني نظام د لاس ته راوړنو په اړه هیڅ هم نه دي ویلي او تل یې منفي ټکو ته پام کړی دی.
د طالبانو د حکومت ویاند ذبیح الله مجاهد دغه خبرې داسې مهال کوي چې، ټاکل شوې د یوناما ماموریت د روانې مارچ میاشتې په ۱۷مه پاېته رسیږي.
بل لورته بیا امنیت شورا د یوناما د ماموریت د غځېدو په اړه غونډه رابولي.
دا په داسې حال کې ده چې، یوناما په افغانستان کې تل د بشرحقونو ملاتړ کړی او په دې تړاو یې راپورونه چمتو کړي او په نړیوالو دریځونو یې بیان کړي.