تاند【سه شنبه د کب ـ حوت ۱۴مه】د طالبانو د حکومت د کرنې اوبو لګولو او مالدارۍ وزارت سرپرست عطاالله عمري د قوشتېپې کانال د شاوخوا ځمکو د معقولې استفادې طرحه په یوه غونډه کې وړاندې کړه.
عمري د دې طرحې د وړاندې کولو په تړاو د دغه وزارت له لوري په جوړه شوې غونډه کې ویلي، چې د دغه کانال په شاوخوا ځمکو باید منظمو صنعتي، کرنیزو او د مالدارۍ کمپلکسونو ته وده ورکړل شي.
د طالبانو د کرنې، اوبو لګولو او مالدارۍ وزارت په خبرپاڼه کې زیاته شوی، چې په دغې غونډه کې د ښار او کور جوړولو وزارت، د کرنې، اوبو لګولو او مالدارۍ وزارت، د مالیې وزارت سرپرستانو، د طالبانو چارو ادارې رییس، د کرنې، اوبو لګولو او مالدارۍ وزارت مرستیال ګډون درلود.
په خبرپاڼه کې همدارنګه زیاته شوې چې، دغه طرحه د کرنې، اوبو لګولو او مالدارۍ وزارت له لوري چمتو او د طالبانو د حکومت لوړ رتبه چارواکو ته وړاندې شوه.
د معلوماتو له مخې قوش تېپې کانال د افغانستان په شمال کې یو له ستر او مهمو اوبو لېږدونکو پروژو څخه دی، چې د آمو له سیند څخه د اوبو لېږدولو لپاره جوړېږي.
دا کانال ۲۸۵ کیلومتره اوږدوالی، ۱۰۸ متره عرض او ۸.۵ متره ژوروالی لري، چې د بلخ ولایت د کلدار ولسوالۍ څخه پیلېږي او تر فاریاب ولایت پورې غځېدلی دی.
د دې کانال هدف د ۵۵۰,۰۰۰ هکتاره ځمکې خړوبول یاد شوي دي.