تاند【دوشنبه د کب ـ حوت ۱۳مه】د ملګرو ملتونو د ماشومانو د ملاتړ صندوق (یونیسف) وایي چې، په ۲۰۲۵ کال کې کابو ۲۲.۹ ملیونه افغانان بشري مرستو ته اړتیا لري.
سرچینه زیاتوي چې ۱۲ ملیونه ماشومان هم پکې شامل دي.
د سرچینې په وینا دا شمېرې د هغو کسانو د ملاتړ د دوام ارزښت څرګندوي، چې تر ټولو زیانمنونکي دي.
دغه راز د اقلیم بدلون او طبیعي پېښو د افغانستان بشري ناورینونه لا پراخه کړي او د خلکو د ژوند شرایط یې نور هم سخت کړي دي.
بل لورته د خوراک نړیوال پروګرام هم ویلي چې، جاپان د افغانستان د لوږې او خوارځواکۍ (سوء تغذیې) پر ضد مبارزې لپاره دې ادارې ته ۷ میلیونه ډالر مرسته کوي.
سرچینې په یوه خبرپاڼه کې ویلي چې، دغه مرسته به د بیړنیو خوراکي مرستو، د خوارځواکۍ مخنیوي او په ښوونځیو کې د تغذیې د پروګرامونو پیاوړتیا لپاره ولګول شي.
د سرچینې په وینا، نږدې ۳۰ زره کورنۍ، چې شمېر یې تر ۲۰۰ زرو کسانو زیاتېږي، دوی به د درې میاشتو لپاره له دې خوراکي مرستو ګټه واخلي.