تاند (دوشنبه، د کب/ حوت ۱۳ مه) د خیبر پښتونخوا اعلی وزیر، علي امین ګنډاپور، د طالبانو له سرقونسل محبالله شاکر سره په پېښور کې ولیدل او د تورخم دروازې د بندیدو له امله د رامنځته شویو ستونزو په اړه یې خبرې وکړې.
هغه ټینګار وکړ چې د دې دروازې بندېدا د دواړو خواوو په ګټه نه ده او باید ژر تر ژره بېرته پرانستل شي.
د خیبر پښتونخوا د اعلی وزیر دفتر په یوه خبرپاڼه کې ویلي چې په دې ناسته کې د دوه اړخیزې سوداګرۍ د پراختیا، د سیمه ییز ثبات، او په خیبر پښتونخوا کې د مېشتو افغانانو د ستونزو د هواري په باب خبرې وشوې.
خبرپاڼه زیاتوي، دواړو لوریو د سوداګرو او عامو خلکو د زیانونو په اړه هم خبرې وکړې. دواړو خواوو د روژې میاشتې او د کوچني اختر رانژدې کېدو ته په اشاره موافقه وکړه، چې دا لاره باید ژر تر ژره بېرته خلاصه شي.
علي امین ګنډاپور وویل چې د روژې په میاشت کې د تورخم تړلو تاجرانو او بار وړونکو موټر چلوونکو ته زیان رسولی، او دا وضعیت د هیڅ لوري په ګټه نه دی. هغه ټینګار وکړ، چې د خلکو ستونزې باید ژر تر ژره حل شي.
نوموړي زیاته کړه چې د خیبر پښتونخوا ایالتي حکومت د تورخم د خلاصون لپاره هڅې کوي، او د طالبانو له سفارت څخه یې هم د همکارۍ غوښتنه وکړه.
د پاکستان فدرالي حکومت د خیبر پښتونخوا د حکومت له دغه اقدام سره موافق نه دی
علي امین ګنډاپور د دواړو خواوو ترمنځ د ترینګلو اړیکو یادونه وکړه، او ویې ویل چې د سیمې ناامني د دواړو غاړو خلکو ته ستونزې جوړې کړي. هغه ټینګار وکړ، چې مذاکرات او خبرې اترې د سیمې د تلپاتې سولې لپاره غوره لاره ده.
نوموړي زیاته کړه، چې د ایالتي حکومت له لوري یوه جرګه د طالبانو له حکومت سره د مذاکراتو لپاره چمتو شوې، خو دا مهال د پاکستان د مرکزي حکومت د تایید په تمه ده. هغه وویل، چې له نهایي کېدو وروسته به، دا پلاوی افغانستان ته واستول شي.
خو د اسلامآباد مرکزي حکومت د خیبر پښتونخوا د اعلی وزیر او طالبانو ترمنځ د دې خبرو ملاتړ نه کوي. د پاکستان چارواکو ویلي چې له یوه بهرني هیواد سره د ایالتي چارواکو مستقیم خبرې د مرکزي حکومت حیثیت ته تاوان رسوي.
د پاکستان د صدراعظم شهباز شریف حکومت، چې د ګنډاپور له مخالف ګوند سره تړاو لري، د خیبر پښتونخوا د اعلی وزیر هر ډول رسمي مذاکرات رد کړي دي.
سره له دې مخالفتونو، علي امین ګنډاپور وویل، چې ایالتي حکومت هڅه کوي، د تورخم دروازې د پرانیستلو لپاره ځانګړې معامله وشي، تر څو د سوداګرۍ، درملنې او زده کړو په موخه خلکو ته د تګ راتګ اسانتیاوې برابرې شي.
تورخم دروازه لسو ورځو راهیسې د پاکستان له خوا تړل شوې ده.