تاند【چهارشنبه د کب ـ حوت ۸مه】افغان کرېکټ ملي لوبډله نن (چهارشنبه، د کب ۸مه) د اتلانو جام سیالیو کې د انګلستان پر وړاندې لوبه کوي.
دغه لوبه د افغانستان پر وخت ماسپښین ۱ نیمه بجه د پاکستان په لاهور لوبغالي کې پیلیږي.
افغانستان تر دې وړاندې خپله لومړنۍ لوبه د جنوبي افریقا پر وړاندې وبایلله.
پرون په یادو لوبو کې د اسټرالیا او جنوبي افریقا ترمنځ لوبه د باران له امله ونشوه.
اوس افغانستان دوهم پړاو ته د وتلو لپاره اړ ده چې خپلې پاتې دواړه لوبې وګټي.
بل لورته په دې لوبو کې کوربه پاکستانۍ لوبډله هم تر پرلپسې دوه ماتو وروسته له لوبو بهر شوه.
افغان لوبډلمشر حشمت الله شهیدي ډاډ څرګند کړی چې نننۍ لوبه به ګټي او پیاوړي به را څرګنديږي.