تاند【سه شنبه د کب ـ حوت ۷مه】په کندهار ولایت کې د شدید باران له امله د یوه کور چت رالوېدلی چې، له امله یې پنځه تنه مړه شوي او درې نور ژوبل دي.
په یاد ولایت کې له پېښو سره د مبارزې رياست نن سهشنبه په يوه خبرپاڼه کې ويلي چې، د مرکز اوومې ناحیې اړوند په کوبي سیمه کي د یوه کور د چت نړېدلی او له امله یې په پېښه کې پنځه تنو ژوند بایللی دی.
سرچینه زیاتوي چې، د پنځمې ناحیې اړوند په ښوراندام سیمه کې هم يوه نجلۍ اوبو وړې او مړه شوې ده.
سرچینه کاږي چی په دې پېښو کې درې تنه ژوبل شوي او روغتیايي حالت يې نازک ښودل شوی دی.
ځایي طالب چارواکو ويلي، چې په مړو او ژوبلو کې ښځې او ماشومان هم شامل دي.
د افغانستان د یو شمېر ولایتونو په لرې پرتو سیمو کې ډېری وخت د شدیدو بارانونو له امله خلک زیات ویني.