تاند(شنبه د کب/ حوت ۴ مه) د طالبانو د اطلاعاتو او کلتور وزارت «بیگم» او «ځوانان» راډیوګانو ته، چې په وروستیو کې بندې کړې وې، اجازه ورکړه چې خپل فعالیت بیا پیل کړي.
دغه وزارت نن (شنبې) وویل، چې د راډیو د بیګم او ځوانانو راډیوګانو مسوولانو ژمنه کړې چې د طالبانو د اصولو مطابق به فعالیت کوي او په راتلونکي کې به له هر ډول سرغړونې ډډه کوي.
د طالبانو د اطلاعاتو او کلتور وزارت د سلواغې/ دلوې په ۱۶مه د «بیگم» راډیو فعالیت په دې نوم ځنډولی و چې ګواکې له بهرنیو رسنیو سره همکاري لري، او همداراز یې د دې راډیو یو شمېر خبریالان نیولي وو.
د «بیگم» او «ځوانان» راډیوګانې په کابل او شاوخوا ولایتونو کې اورېدل کېږي.
د «بیگم» راډیو مسوولانو ویلي وو، چې د طالبانو د اطلاعاتو او کلتور وزارت د دوی د ښځینه کارکوونکو کمپیوټرونه، هارډ ډیسکونه او موبایلونه ضبط کړي او دوه نارینه کارکوونکي یې نیولي دي.
د طالبانو د اطلاعاتو او کلتور وزارت د کب/ حوت په ۴مه، په یوه خبرپاڼه کې لیکلي چې د دواړو راډیوګانو مسوولانو څو ځله د بېرته فعالیت غوښتنه کړې او «ژمنه یې کړې چې د اسلامي امارت د اصولو او ژورنالیزم مطابق» به فعالیت کوي.
په افغانستان کې د ملګرو ملتونو سیاسي استازولۍ (یوناما)، د ملګروملتونو د بشري حقونو ځانګړي راپور ورکوونکي، او د رسنیو ملاتړ کوونکو بنسټونو د «بیگم» راډیو د فعالیت ځنډېدا غندلې او د دې راډیو د کارکوونکو د سمدستي خوشي کېدو غوښتنه یې کړې وه.
د طالبانو له واک ته رسیدو وروسته ګڼ شمېر راډیوګانې، تلویزیونونه او چاپي رسنیو فعالیت درولی دی.