تاند【پنجشنبه د کب ـ حوت ۲مه】د افغانستان کرېکټ ملي لوبډله د اتلانو جام سیالیو کې سبا (جمعه، د کب ۳مه) خپله لومړۍ لوبه له جنوبي افریقا سره کوي.
دغه لوبه په پاکستان کې د افغانستان پر وخت له ماسپښین وروسته ۱ نیمه بجه پیلیږي.
د دې سیالیو په لومړۍ لوبه کې نیوزیلنډ د پاکستان کرېکټ ملي لوبډلې ته د ۶۰ منډو په توپیر ماتې ورکړه.
د لوبې په لومړۍ نیمایي کې نیوزیلنډ د ۵ لوبغاړو په له لاسه ورکولو سیالې لوبډلې ته د ۳۲۱ منډو هدف وټاکه، چې په پوره کولو کې یې پاکستانۍ لوبډله پاتې راغله او په ۴۷.۲ اورونو کې یې د ټولو لوبغاړو پر سوزېدو نیوزیلنډ ته لوبه بایلوله.
د اتلانو جام دوهمه لوبه نن (پنجشنبه) ماسپښین ۱۲:۳۰ د هند او بنګله دیش لوبډلو ترمنځ ترسره کېږي.