تاند (چهارشنبه، د سلواغې/ د کب/ حوت لومړۍ) د ملګروملتو د مهاجرت نړیوال سازمان یا آی او ایم وايي، د روان په لومړۍ میاشت کې، له اسلاماباد او راولپنډۍ ښارونو څخه تر ۱۸ زره زیات افغانان بېرته افغانستان ته ستانه شوي دي.
د دې راپور له مخې، یوازې د جنورۍ په دوهمه نیمایي کې ۹,۸۴۶ تنه له یادو ښارونو افغانستان ته تللي دي.
د مهاجرت نړیوال سازمان د چهارشنبې په ورځ په یوه راپور کې ویلي چې د جنورۍ له شپاړسمې څخه تر ۳۱ پورې، د ۲۹۱ کورنیو مشرانو افغانستان ته د بېرته ستنېدو اړوند فورمې ډکې کړې دي.
دا سازمان وايي چې د ۲۰۲۳ له سپتمبر څخه تر اوسه ۸۲۴,۵۶۸ کسان افغانستان ته ستانه شوي، چې له دې ډلې ۱۸,۵۷۷ تنه یوازې د روان کال په جنورۍ کې بېرته تللي دي؛ دا د ټولو ستنو شویو افغانانو ۲ سلنه جوړوي.
د ستنېدونکو احصائیه
- ۴۶ سلنه بېرته تلونکي له ۱۸ څخه تر ۵۹ کلنۍ پورې عمر لري.
- ۳۰ سلنه له ۵ څخه تر ۱۷ کلنۍ پورې دي.
- ۱۰ سلنه کورنۍ د ښځو تر سرپرستۍ لاندې دي.
- ۵۲ سلنه ستنېدونکي ښځې دي، ۴۸ سلنه یې نارینه دي.
د راستنېدو عوامل
د مهاجرت نړیوال سازمان ویلي چې ۷۸ سلنه افغان کډوال د پاکستاني پولیسو له نیولو څخه د وېرې له امله بېرته افغانستان ته ستانه شوي دي.
راپور زیاتوي چې ۳۴ سلنه کډوال د کور د کرایې د وس نه لرلو له امله بېرته تللي دي.
همداراز، ټولنیز فشار، بېکاري، او د اوبو، برېښنا، او نورو لګښتونو د ورکولو د وس نه لرل د افغان کډوالو د بېرته ستنېدو عمده عوامل دي.
په وروستیو کې پاکستان د اسلاماباد او راولپنډۍ ښارونو څخه د افغان کډوالو د نیولو او شړلو بهیر سخت کړی دی.
پرون د ملګروملتو د کډوالو لویې کمیشنرۍ د پاکستان د حکومت هغه پرېکړه په راولپنډۍ او اسلام اباد کېمېشتو افغانانو ته اعلان کړه چې پر اساس یې باید ټول هغه افغانان چې معتبرې ویزې نه لري د روانې فبرورۍ تر ۲۸ پورې له دغو ښارونو ووځي.
د کډوالو لویې کمیشنرۍ په اسلام اباد او راولپنډۍ کې دېره افغانانو ته خبر ورکړ چې ژر ووځي