تاند【چهارشنبه د کب ـ حوت لومړۍ】پاکستاني رسنۍ وایي، د سند ایالت له حکومتي ګودامونو ۱۷۰زره بورۍ غنم غلا شوي.
سرچینې زیاتوي چې، د ورکو شویو غنمو په تړاو یې څلور تنه د خوراکي توکو څارونکي نیولي او تر څېړنې لاندې دي.
د پاکستاني رسنیو راپورونو کې راغلي چې، د اړوندو ارګانونو له لوري دغه څلور تنه تورنو کسانو ته ۱۴ ورځې وخت ورکړل شوې چې په لیکلي ډول د ورکو شویو غنمو په اړه معلومات ورکړي.
د سرچینې په راپور کې راغلي، که چېرې د نیول شویو کسانو ځواب د قناعت وړ نه وي له دندو به ګوښه شي.
پاکستان کې د نا امنیو له امله د ځایي اوسېدونکو په باور یې هېڅ شی خوندي نه دي.
دوی وایي امنیتي ادارې په خپلو چارو کې دومره پاتې راغلي چې، د خپل ځان ساتنه نشي کولی او کله نا کله وسله وال کسان پولیس تښتوي.