تاند【شنبه د سلواغې ـ دلوې ۲۷مه】په تاجکستان کې یوې محکمې تر ۳۰ ډېر کسان د تېر نوي کال د مراسمو د ګډونوالو د مسمومولو د هڅې په جرم له ۸ تر ۲۰ کلونو پر بند محکوم کړي دي
د تاجکستان یوې امنیتي سرچینې رویټرز ته ویلي،چې ټولو محکوم شويو کسانو له “داعش خراسان” ډلې سره تړاو درلود.
د معلوماتو له مخې تورنو کسانو تېر کال د نوروز د مراسمو پر مهال د پلازمېنې په ختیځ وحدت ښار کې په زهرجنو خوړو سره د دغه جشن د ګډونوالو د مسمومولو هڅه کړې وه.
د تاجکستان د لویې څارنوالۍ د ترورېزم او افراطیت پر وړاندې د مبارزې مشر جمعه نظر سید احمدزاده خبریالانو ته وویل، چې د دغې پېښې په تړاو لس نور کسان هم تر څار لاندې دي.
د تاجکستان رسنیو د راپورونو له مخې، د روانې میاشتې په پیل کې د داعش نهو زندانیانو د وحدت ښارګوټې له زندان د تيښتي د هڅې پر مهال ۵ نور زندانیان هم وژلي وو.
تاجکستاني چارواکو په وار وار په افغانستان کې د داعش د فعالیتونو او په تاجکستان کې د هغو د نفوذ په اړه اندېښنه ښودلې ده.
خو بل لورته بیا طالبانو افغانستان کې د داعش شتون په وار وار رد کړی او پاکستان یې د داعش د تولید مرکز بللی دی.