تاند (یکشنبه، د سلواغې/ دلوې ۲۱ مه) د ایران دولتي خبري اژانس ایرنا په مزارشریف کې د خپل هیواد د جنرال کونسل په قول ویلي چې خامنه يي ورته امر کړی چې له افغانستان سره اعظمي تعامل وکړي.
عليرضا احمدي پرون (شنبې) په مزارشریف کې یوې غونډې ته وویل، د ایران د اسلامي جمهوریت مشر علي خامنهيي له افغانستان سره د اعظمي تعامل پر پالیسۍ ټینګار لري.
د نوموړي په وینا، د ایران مشر باور لري چې د سیمې ستونزې باید د سیمې هېوادونه حل کړي.
په مزارشریف کې د ایران جنرال کونسل زیاته کړه چې د ایران اسلامي جمهوریت د خپلو سیاستونو او تګلارو له مخې د هر هغه اقدام ملاتړ کوي چې د سولې او ثبات د ټینګښت سبب شي.
هغه همداراز وویل چې د ایران لومړیتوب له افغانستان سره “د اقتصادي اړیکو پراخول” دي.
ایران د نورو هیوادونو په شان د طالبانو حکومت په رسمیت نه پېژني، خو تهران له دې ډلې سره پراخې سیاسي او اقتصادي اړیکې لري.
حاضردمه ایران د افغانستان تر ټولو ستر اقتصادي شریک دی.