تاند (سې شنبه، د دلوې ۲ مه) د امریکا د نوي ولسمشر ډونالډ ټرمپ له لوري متحدو ایالتونو ته د نژدې ۱۶۶۰ افغانانو د تګ مخه ونیول شوه چې دغه هیواد ته یې د تګ پرېکړه شوې وه.
دا خبره د دوشنبې په ورځ د امریکا یوه چارواکي او د کډوالو د ځای پر ځای کولو یوه مخکښ مدافع وکړه.
په دې ډله کې هغه بېسرپرسته ماشومان شامل دي چې په امریکا کې له خپلو کورنیو سره د یو ځای کېدو په تمه دي، او همداراز هغه افغانان چې د امریکايي پوځیانو د ملاتړ په خاطر د طالبانو د غچ اخیستنې له خطر سره مخامخ دي.
د ستريټ ټایمز ورځپاڼې د راپور له مخې، دا خبره د ايتلاف مشر شاون وین ډایور، او د یوه امریکايي چارواکي د نوم د نه ښودلو په شرط وکړه.
دغه پرېکړه همداراز زرګونه نور افغانان په ناڅرګند حالت کې پرېږدي چې د کډوالو په توګه یې په امریکا کې د ځای پر ځای کېدو منظوري ترلاسه کړې، خو لا یې له افغانستان یا ګاونډي پاکستان څخه د الوتنې وخت نه دی ټاکل شوی.
ټرمپ د ۲۰۲۴ کال په انتخاباتي کمپاین کې ژمنه کړې وه چې د مهاجرت شرایط به سخت کړي. د ده بیا واک ته رسیدو د امریکا د کډوالۍ د پروګرامونو برخلیک له مبهم حالت سره مخامخ کړی دی.
سپینې ماڼۍ او د بهرنیو چارو وزارت چې د امریکا د کډوالو پروګرامونه څاري، د تبصرې غوښتنې ته سمدستي ځواب ونه وایه.
ډونالډ ټرمپ د امریکا د اووه څلوېښتم ولسمشر په توګه د امریکا د کانګرس په ودانۍ کې پرون (دوشنبې) لوړه وکړه او د خپلې ولسمشرۍ دوهمه دوره یې رسماً پیل کړه.