تاند (جمعه، د مرغومي/ جدي ۲۸ مه) په جنوبي وزیرستان کې د احمدزیو وزیر قبیلې نن اعلان وکړ چې د انګور اډې تجارتي لار یې بیا پرانیستې، خو ټینګار یې کړی چې دا لار به یوازې د سوداګرۍ لپاره خلاصه وي، او د دوی پرلت به په خپل حال پاتې وي.
دا تجارتي لاره د احمدزي وزیر قبیلې له خوا ۱۶ میاشتې پخوا (د ۲۰۲۳ سپټمبر)، کله چې حکومت پر دیورند کرښه د اوښتو رااوښتو لپاره د ویزې او پاسپورټ شرط ولګاوه، بنده شوه.
د احمدزي وزیر قبیلې مشران او ځایي سوداګر وایي چې د دې لارې د بندېدو له امله نه یوازې تجارتي فعالیتونه درېدلي، بلکې د زرګونو خلکو ژوند او روزګار هم اغېزمن شوی دی. دوی وایي، د لارې د تړل کېدو له کبله هره ورځ په میلیونونو روپۍ زیان اوښتی او ګڼ شمېر ځایي خلک خېرات غوښتلو ته اړ شوي دي.
د احتجاج پر مهال د قبیلې مشرانو ۱۸ غوښتنې وړاندې کړې چې پکې د شرطونو لغوه کېدل، په سیمه کې د موبایل او انټرنیټ اسانتیاوې، او د ښوونځیو، کالجونو، او روغتونونو جوړول شامل وو.
ځايي پاکستاني چارواکو سره له دې چې د دې لارې له پرانیستلو سره موافقه کړې خو ویلي یې دي چې درې میاشتې وروسته به د ویزې او پاسپورټ شرطونه بیا عملي شي.
د ځایي خلکو یوه مهمه غوښتنه دا وه چې پرته له اسنادو پر دیورند کرښه ازاد تګ راتګ ته اجازه ورکړل شي، خو په دې اړه هیڅ پرمختګ نه دی شوی. د دوی په وینا، که غوښتنې یې په پام کې ونه نیول شي، نو د احتجاج د دوام امکان شته.