تاند (جمعه، د مرغومي. جدي ۲۸ مه) د ملګروملتو د کډوالو لویه کمیشنري وايي، پاکستان د افغان کډوالو د ایستلو په لړ کې له پلازمینې د هغو افغانانو په شمول چې د یو این ایچ سي ار اسناد یې لرل، ګڼ شمېر افغانان ایستلي دي.
د کډوالو د لویې کمیشنرۍ د معلوماتو له مخې، د جنورۍ له لومړۍ تر پنځلسمې نېټې پورې، د اسلاماباد چارواکو ۲۸۵ افغانان له هېواده ایستلي دي.
د دې ادارې د پاکستان استازې فیلیپا کندلر(Philippa Candler)، پرون (پنجشنبې) د امریکا غږ انګلیسي برخې ته وویل چې په شړل شویو کسانو کې ۸۰ تنو داسي اسناد هم لرل چې دوی ورکړي وو.
که څه هم د ملګرو ملتونو د کډوالو د لویې کمېشنرۍ له خوا ورکړل شوي لومړني اسناد افغانانو ته قانوني خوندیتوب نه ورکوي، خو دا ښيي چې اداره د دوی د کډوالۍ د وضعیت د ټاکلو په حال کې ده، یا دا چې یو څوک د بیا مېشتېدو د بهیر په لومړیو پړاوونو کې دی، کندلر وضاحت وکړ.
کندلر وویل چې په تېرو وختونو کې د پاکستان چارواکو معمولاً د هغو کسانو له شړلو ډډه کوله چې د دوی د ادارې (یو این ایچ سي آر) له خوا ورکړل شوي اسناد یې لرل.
کنډلر زیاته کړه: «موږ په عمومي ډول کولی شو چې هغه افغانان خوشې کړو چې زموږ اسناد ورسره وي.»
پاکستان د ۲۰۲۳ له اکتوبر څخه د افغانانو د ایستلو او ځورولو بهیر پیل کړی دی.
کندلر وویل چې په تېر کې د پاکستان دا نرمي د دغه هیواد له حکومت سره د دوی د ښو اړیکو له امله وه.
د شړلو امر
سخت اقدامات وروسته له هغه پیل شول چې د پاکستان د کورنیو چارو وزیر محسن نقوي د نوومبر په میاشت کې اعلان وکړ چې ټول افغان اتباع باید د کال تر پایه په پلازمېنې کې د اوسېدو لپاره له ځانګړې ادارې ۰سپېشل برانچ) څخه د نه اعتراض سند (NOC) ترلاسه کړي.
وزیر تور ولګاوه چې افغان اتباعو په هغه مظاهره کې برخه اخیستې وه چې د پخواني صدراعظم عمران خان د خلاصون لپاره د نوومبر له ۲۴مې څخه تر ۲۶مې نېټې پورې اسلاماباد ته وشوه.
په دې مظاهره کې لږ تر لږه څلور امنیتي پرسونل وژل شوي وو. خو پاکستاني شنونکي وايي چې نقوی دا ادعا د دې لپاره وکړه چې له یوې خوا د عمران خان لپاره مظاهره په خپله ټولنه کې بدنامه کړي او له بلې خوا د افغانانو ځپلو ته پلمه جوړه کړي.