تاند (پنجشنبه، د مرغومي/ جدي ۱۳ مه) د ایټالیا د فېشن او اقتصاد په پلازمېنې، میلان کې، نور دباندې او عامه ځایونو کې هم د سګرېټ څکول منع شوي دي. دا له ۲۰۲۱ کال راهیسې د بندیزونو په دوام کې تر ټولو سخت بندیز دی، چې موخه یې د ښار د هوا د کیفیت ښه کول دي.
په میلان، چې د ایټالیا دوهم لوی ښار دی، اوس په له سرپټو ځایونو دباندې او عامه ځایونو کې پر سګرېټ څکولو بندیز لګول شوی دی.
د ښاروالۍ له لوري دا بندیز د جنورۍ له لومړۍ نیټې نافذ شو، چې په ایټالیا کې د فېشن په پلازمېنې کې تر ټولو سخت بندیز ګڼل کېږي.
هغه کسان چې د دې نوي قانون سرغړونه کوي، ممکن له ۴۰ څخه تر ۲۴۰ یورو پورې جریمه شي.
ځايي چارواکي وايي چې دا بندیز د واټونو په شمول د “ټولو عامه ځایونو ” لپاره دی، خو یوازې په جلا او انفرادي ځایونو کې استثنا شته. په داسې ځایونو کې د سګرېټ څکوونکو لپاره ټاکل شوي شرایط برابر وي یعني له نورو خلکو څخه لږترلږه ۱۰ متره فاصله ساتل شوې وي. دا بندیز د هغه نوښت وروستی ګام دی چې په ۲۰۲۱ کال کې پیل شوی و، او هدف یې د ښار د هوا د کیفیت ښه کول دي. چارواکي وايي چې د دې بندیز هدف د هغو کسانو د روغتیا ساتنه ده چې په عامه ځایونو کې د غیر فعال لوګي له زیانونو څخه اغېزمنېږي، په ځانګړي ډول هغه ځایونه چې ماشومان پکې تګ راتګ کوي.
دا بندیز په الکترونیکي سګرېټو یا وېپونو باندې نه تطبیق کېږي.
د میلان ښار شورا په ۲۰۲۰ کال کې د هوا د کیفیت لپاره یوه طرحه تصویب کړه، چې د سګرېټ څکولو تدریجي بندیزونه او کمښت پکې شامل وو. په ۲۰۲۱ کال کې د دې طرحې تر لومړي بندیز لاندې، په عامه پارکونو، د ماشومانو د لوبې ځایونو، د بسونو تمځایونو، او ورزشي تاسیساتو کې د سګرېټ څکول منع شوي و.
دا نوی بندیز د میلان د کورټینا ۲۰۲۶ یا ژمني اولمپیک څخه مخکې پلي کېږي.
میلان د اروپا له هغو ښارونو څخه دی چې د هوا له ککړتیا څخه زیات اغېزمن دی.