تاند ( یکشنبه د مرغومي/ جدي ۲مه) د طالبانو تر واک لاندې د عامې روغتیا وزارت خبر ورکړی دی چې ټاکل شوې سبا دوشنبه د ډسمبر په ۲۳ مه په ۱۱ ولایتونو کې د پولیو ګوزڼ ضد واکسین کمپاین پیل شي.
د طالبانو عامې روغتیا وزرات د یوې خبرپاڼې په خپرولو سره ویلي، چې دغه کمپاین به د ډسمبر تر ۲۵ مې نېټې پورې دوام وکړي.
سرچینې زیاته کړې، چې د دې کمپاین په ترڅ کې به شاوخوا ۴،۸ میلیونه له پنځو کلنو کم عمره ماشومان واکسین شي.
د سرچینې د معلوماتو له مخې دا کمپاین به کابل، کندهار، هلمند، روزګان، زابل، ننګرهار، کونړ، لغمان، نورستان، هرات او کندز ولایتونه تر پوښښ لاندې ونیسي.
دغه کمپاین د پولیو ناروغۍ د مخنیوي لپاره ترسره کېږي.
افغانستان او پاکستان د نړۍ دوه هغه هېوادونه دي، چې د پولیو ناروغي پکې موجوده ده.
کوم ماشومان چې دا واکسین ونه کړي ، د فلج یا شلېدو په ناروغۍ اخته کیږی . دا ماشومان به ټول عمر معیوب وي. د دغو معصومو او ګلالیو ماشومانو د فلج کېدو مسوولیت به دهغو والدینو یا موروپلار او د هغوی د ولیانو په غاړه وي ، چې په دې برخه کې غفلت کوي او خپل ماشومان نه واکسینوي .