تاند ( جمعه د لیندۍ/ قوس ۳۰مه) د امریکا د بهرنیو چارو وزیر انتونيو بلینکن د مصنوعي ځیرکتیا په اړه د ملګرو ملتونو د امنیت شورا غونډې ته په وینا کې خبرداری ورکړی، چې د مصنوعي ځیرکتیا ناسمه کارونه نړۍ والې سولې او امنیت ته جدي ګواښ پېښولی شي.
نوموړي زیاته کړې، چې د امریکا ولسمشر جو بایډن تېره نومبر میاشت کې له خپل چینایي سیال، شي جین پینګ سره کتنه کې ټینګار کړی و چې، اټومي وسلې باید یوازې د انسانانو له لوري کنټرول کړای شي.
د بلېنکن په خبره، هکران کولی شي له دې لارې ویجاړوونکي سایبري بریدونه ترسره کړي.
مصنوعي ځیرکتیا (Artificial intelligence یا اې آی) هغې ځیرکتیا ته ویل کېږي، چې د ژویو او انسانانو له لوري د ښودل کېدونکې طبیعي ځېرکتیا پرخلاف د ماشین په وسیله ښودل کېږي.