تاند ( چهارشنبه د لیندۍ ۲۸مه) د طالبانو د حکومت د ځمکو له غصب څخه د مخنیوي کمېسیون د تېرې یوې میاشتې په اوږدو کې په کندهار، کندوز، جوزجان، غور، خوست او پنجشېر ولایتونو کې ۲۰ زره ۳۷۶ دولتي ځمکه له قانوني پړاو وروسته را ګرځولې ده.
د طالبانو د عدلیې وزارت وایي، د تېرې یوې میاشتې په ترڅ کې تر ټولو زیاته را ګرځول شوې ځمکه په کندهار ولایت کې وه چې ۹ زره ۶۱۰ جریبه ځمکه پکې شامله ده.
یاد وزارت وایي، دغه راز د ځمکو له غصب څخه تخنیکي غړو د یادې میاشتې په اوږدو کې نږدې ۳۱۷ زره جریبه دولتي ځمکه د افغانستان په ۲۵ ولایتونو کې تثبیت کړې او تر ۳۷۵ زره جریبه نوره ځمکه په ۳۱ ولایتونو کې تر څېړنې لاندې نیول شوې ده.
سرچینه زیاتوي،چې د حاکمیت له پیل څخه یې تر دې دمه په هېواد کې د غاصبینو له منګولو میلیونونه جریبه دولتي ځمکې را ګرځول شوې ده.