تاند (یکشنبه، د لیندۍ/ قوس ۴ مه) د درې هیوادونو د نولس کلونو د کرکټ لوبډلو ترمنځ په سیالیو کې نن د افغانستان په ۸ ویکټونو د متحده عربي اماراتو لوبډلې ته ماته ورکړه.
د متحده عربي اماراتو لوبډلې، چې پچه ګټلې وه، لومړی بیټنګ وکړ خو ټول لوبغاړي یې په داسي حال کې چې ۸۸ منډې یې کړې وې، وسوځېدل.
افغان لوبغاړو د سیالې لوبډلې ټاکل شوی هدف په ۲۱ اور او ۲ توپ د دوو لوبغاړو په تاوان پوره کړ.
د افغان لوبډلې عبدالعزیز ۲، نصیرخان معروفخېل ۳، روح الله عرب ۲، خاطر ستانکزي ۲ او نظیق امیري یو لوبغاړی وسوځول.
د افغان باولرانو یا توپ ویشتونکو په منځ کې تر ټولو ډېرې منډې وزیرخان وکړې. ده په ۷۱ توپونو ۵۷ منډې وکړې.
ټاکل شوې ده چې د افغانستان تر اتلسو کلونو کشره لوبډله د پنجشنبې په ورځ له پاکستان سره په پایلوبه کې مخامخ شي.
افغانستان تر دې وړاندې یوه سیالي له پاکستانه ګټلې خو بله یې پرې بایللې ده.
دا سیالۍ، چې د متحده عربي اماراتو په کوربه توب ترسره کېږي، په لړ کې یې د افغانستان، پاکستان او متحده عربي اماراتو تر نولس کلونو د کشرو لوبډلې له یو بل سره دوه – دوه ځلې مخامخ شوې.
افغانستان له اماراتو او پاکستان څخه لومړۍ مسابقې هم په لوی توپیر ګټلې وه.