تاند (دوشنبه، د عقرب ۲۸ مه) تقریباً په هر ځای کې چې سوپرمارکیټ ته ولاړ شئ، د یوې متوسطې اندازې کیلې بیه له ۱۰ څخه تر ۵۰ سینټو پورې وي (منځنۍ بیه یې ۳۰ سینټه ده). خو یوه کیله چې د نقره‌يي ټیپ په وسیله په یوه دیوال پورې نښلول شوې وي، ممکن په نیویارک کې د ساتبیز (Sotheby’s) په یوه مزایده کې تر یو نیم میلیون میلیونه ډالرو په زیاته بیه وپلورل شي.

دا ژېړه کیله چې په سپین پورې دیوال نښلول شوې، د “کومدین” په نوم د یوه اثر برخه ده چې ایټالیايي هنرمن موریتسیو کاتلان (Maurizio Cattelan)  جوړه کړې ده. دا اثر لومړی ځل په ۲۰۱۹ کال کې د میامي په آرت بازل (Art Basel)  نندارتون کې نندارې ته وړاندې شو او پراخ بحثونه یې وپارول.

ځینې نقادانو دا اثر یوازې یوه ټوکه وګڼله، خو ځینو نورو بیا دا د معاصر هنر په وړاندې د اعتراض نښه بلله. دغه کیله څو ځلې هم خوړل شوې ده.

په دې کې، د ۲۰۱۹ کال په دسمبر کې امریکایي هنرمن ډیوېډ داتونا (David Datuna)  دغه کیله له دیوال څخه لرې کړه او ویې خوړه. هغه خپل عمل “د وږي هنرمن” په نوم د یوه هنري اجرا په توګه معرفي کړ. البته، هر ځل یې پر ځای بله کیله کېښودل شوه.

د دې اثر د لیدونکو له تود هرکلي او د سلفي اخیستو د لوړې غوښتنې له امله، دا اثر د خلکو له سترګو پټ شوی و.

د پروتن ګالري (Perrotin Gallery)  پر اساس، د دې اثر درې نسخې تر دې دمه له ۱۲۰ زرو څخه تر ۱۵۰ زرو ډالرو پورې پلورل شوې دي. خو اوس مهال د دې مفهومي هنري اثر ارزښت له ۱.۵ څخه تر ۲.۳ میلیون ډالرو پورې اټکل کېږي. دا اثر د نوومبر په ۲۰مه نېټه په ساتبیز مزایده کې نندارې ته وړاندې کېږي.

د نیویارک ساتبیز رئیس ډیوېډ ګالپرین د دې مزایدې په اړه وایي:
“هغه څه چې د ‘کومدین’ په پیرودلو سره تاسو ترلاسه کوئ، یوازې کیله نه ده، بلکې د اصالت سند دی چې تاسو ته اجازه درکوي چې دغه کیله او نقره‌يي ټیپ په خپل دیوال باندې د موریتسیو کاتلان د اصلي هنري اثر په توګه ځای پر ځای کړئ.”

هغه زیاتوي:
“کاتلان په دې کار سره د معاصر هنر د دروازې خلاصولو ترڅنګ دا پوښتنه راپورته کوي چې موږ څرنګه یوه پدیده د هنري اثر په توګه تعریفوو او هنري اثارو ته ارزښت ورکوو؟”