د بریکس د مشرانو ۱۶مه سرمشريزه د اکتوبر په ۲۲مې نېټې د روسيې په کازان ښار کې پیل شوې او تر ۲۳مې نېټې پورې به دوام ولري. دا د نويو غړيو له منلو وروسته د دغه سازمان لومړۍ سرمشريزه ده، چې پکې د چين د دولت رئيس شي جين پينګ په شمول د څه باندې ۳۰ هېوادونو او نړيوالو سازمانونو مشرانو ګډون کړی دی.
برېکس په ۲۰۰۹م کال کې د څلورو هېوادونو (برازیل، روسیې، هند او چین) له لوري رامنځته شو، چې يو کال وروسته سوېلي افريقا هم ورسره یو ځای شوه. د دغه سازمان نوم د غړو هېوادونو د انګليسي نومونو له لومړیو تورو جوړ دی، چې د جنوبي افریقا له غړیتوب وروسته له برېک څخه په برېکس بدل شو.
برېکس په خپلې کلنۍ سرمشريزې کې مهمې پرېکړې کوي او یو غړی يې د کال پړاویزه مشري پرغاړه اخلي، چې دا ځل يې روسیه کوربتوب کوي.
د برېکس سږنۍ سرمشريزه ” د عادلانه نړیوالې پرمختیا او امنیت په پار د هېوادونو ترمنځ همغږي لا پیاوړې کول” په عنوان ترسره کېږي، چې پکې د اقتصادي همکاریو د پیاوړتیا سربېره، د سیمې د عمومي وضعیت په اړه هم خبرې کېږي.
په نړۍ کې داسې لوی بدلونونه روان دي، چې په تېرو سلو کالونو کې یې ساری نه دی لیدل شوی او د سړې جګړې مفکوره او يو اړخيزم پکې د خورېدو په حال کې دي او هر زبرځواک یې د خپلو موخو لپاره يوه او بله وسیله کاروي.
له روسیې او چین سره د امریکا او نورو لوېديځو هېوادونو ترینګلتیا مخ په ډېرېدو ده او همدې ته په کتو د برېکس سږنۍ سرمشریزه د دغه سازمان په تاریخ کې تر ټولو مهمه بلل کېږي.
د برېکس ملاتړي هېوادونه وايي، د امريکا په مشرۍ لوېديځ بډايه هېوادونه د بادارۍ او مشرۍ په لټه په يوې او بلې پلمې پر نورو هېوادونو بنديزونه لګوي، پانګې يې ورکنګل کوي او ګوتڅنډنې ورته کوي. امريکا او ځينو نورو لوېديځو هېوادونو د برېکس د غړو هېوادونو پر تصديو، شرکتونو او ځينو اشخاصو، چې په سر کې يې چين او روسيه دي، هم بنديزونه لګولي دي، د روسیې پانګې يې کنګل کړي او پر چيني صادارتي توکو يې ډېرې ګمرکي تعرفې لګولې دي.
برېکس په دې نیت جوړ شوی، چې د نړۍ د لویو پرمختيايي يا مخ پر ودې هېوادونو سیاسي او اقتصادي ځواک سره یو ځای کړي او پر نړيوال سټېج د لوېدیځو شتمنو هېوادونو رول او اغېز چلېنج کړي.
د برېکس د غړو هېوادونو نفوس د نړيوال عمومي نفوس نيمايي ته نژدې دی او د نړيوال اقتصاد د پرمختګ لپاره يې د خدمت انډول له ۵۰ سلنې زيات او اقتصادي حجم يې د جي ۷ په پرتله لوړ دی، چې د نړيوال اقتصادي پرمختګ لپاره لا پياوړی قوت برابرولی شي.
برېکس د پرمختيايي هېوادونو لپاره د همکاريو او پرمختګ د بحثونو مهم ډګر ګرځېدلی، د ورخلاصون، ټولشموليت، همکاريو او ګډو ګټو روحيه یې خپره کړې او په نړيوالې ادارې یې د مختلفو هېوادونو د ګډون لپاره يو ښه ډګر او فرصت برابر کړی دی.
د برېکس غړيو له سړې جګړې او يواړخيزم سره ټينګ مخالفت ښودلی او د ملګرو ملتونو د منشور د موخو او اصولو پر ساتنې او په سياسي لارو چارو د نړيوالو او سيمه ييزو مسئلو پر هواري یې ټينګار کړی دی.
د وخت په تېرېدو د برېکس غړي زیاتېږي او د ۲۰۲۴م کال په جنورۍ کې یې د سعودي عربستان، مصر، عربي متحده امارات، مصر، اېتوپيا، ارجنټاين، ايران او اتوپيا غړيتوب اعلان کړی او اوسمهال د تايلنډ، ترکيې، اذربایجان، بلاروس، سوريې، مالیزیا او کيوبا په شمول شاوخوا ۳۰ هېوادونو په دغه سازمان کې د غړيتوب هيله ښودلې ده.
چين او روسيه د برېکس هېوادونو د ګډو نظريو د راغونډولو، د همغږۍ او همکاريو د پياوړتيا او د ګډو اجنډاوو د پرمخبېولو په برخو کې کليدي رول لوبوي.
نړيوال تمه لري، د برېکس سږنۍ سرمشريزه به نړۍ ته د ثبات امکانات او مثبت قوت برابر کړي او د پرمختيايي هېوادونو پياوړتيا به وهڅوي.