تاند (سې شنبه/د عقرب ۱) — په ټولنیزو رسنیو خپرې شوې ویډیوګانې ښیي چې د پاکستان د طالبانو تحریک (ټي ټي پي) د دغه هېواد د پوځ پر ضد جنګي عملیاتو کې د ډرون (بې پیلوټه) الوتکو استعمال پیل کړ.
ټي ټي پي د پاکستان پوځ ته چې په ۱۹۴۷ کال کې د دغه هېواد له جوړېدلو څخه لږ مخکې د برتانوي جنرال فرانک والټر میزروي په مشرۍ جوړ شوی دی، د مرتد پوځ الفاظ کاروي.
ویل کیږي چې د پاکستان پوځ او استخباراتي ادارو په افغانستان کې د نړۍ وال ائتلاف د حضور پر وخت یو طرف ته ځان د نړۍ وال ائتلاف ملاتړی باله، د طالبانو مشران یې په امریکا خرڅول، خو بلې خواته یې بیا د افغانستان د وخت حکومت او نړۍ وال ائتلاف پر ضد جنګيالي تربیه کول.
د سیمې د چارو کتونکي په دې نظر دي چې د پاکستان پوځي او استخباراتي ادارو په سیمه کې د نړۍ وال ائتلاف او په ځانګړې توګه د امریکا متحده ایالاتو له حضور څخه دوه اړخیزه استفاده کوله او د امریکایي چارواکو په وینا تر ۳۱ میلیارد ډالرو پورې یې ترې ترلاسه کړي دي.
په خیبر ضلع کې د (#TTP) مربوط د لښکر اسلام وسلوالو پر پاکستاني پوځي تاسیساتو د برید لپاره د ډرون وسلې د کارولو صحنې ښيي.
دا د پاکستاني پوځ لپاره یو خطرناک حالت دی، چې د طالبانو په لاس کې ډرون لیدل کیږي. pic.twitter.com/IEhjbXR0gx
— KDR News (@KDRNews) October 21, 2024
که څه هم چې پاکستاني ادارو د طالبانو مشرانو ته پناه ورکړې وه، بلې خواته بیا د دغه هېواد لومړي وزیر یوسف رضا ګېلاني له امریکا څخه غوښتنه وکړه چې په افغانستان کې د جنګ لپاره دې له خپل هېواد څخه مرمۍ نه راوړي ځکه لګښت پرې ډېر راځي او پاکستان حاضر دی چې د هغوی د اړتیا وړ مرمۍ په پاکستان کې دننه ورته جوړې کړي.
حالات ښیي چې پاکستانۍ ادارې په دغه هېواد کې د امنیتي، اقتصادي او سیاسي ترینګلتیاوو په زیاتېدلو سره د شړېدلو په لور خوځیږي، او که چېرې پاکستاني طالبان پرمختللیو ډرون الوتکو ته لاسرسی پیدا کړي، کېدی شي چې په لنډ وخت کې په دغه هېواد کې په جنګي توازن کې غټ تغیر راولي.