تاند ( یکشنبه د میزان ۲۹مه) افغانستان کې بشري حقونو لپاره د ملګرو ملتونو ځانګړی راپور ورکوونکی په دې هېواد کې د بشري وضعیت په اړه خبرو لپاره نن کاناډا ته ځي.
ملګرو ملتونو په یوه خبرپاڼه کې ویلي، چې بنېټ به یوه اوونۍ په کاناډا کې وي او په دې موده کې به د دغه هېواد له یو شمېر چارواکو او افغان کډوالو سره د افغانستان د بشري وضعیت په تړاو خبرې وکړي.
په کاناډا کې مېشتې مدني فعالې راضیې بارکزۍ بیا رسنیو ته ویلي، چې له بنېټ سره به پر بېلابېلوموضوعاتو خبرې اترې وشي.
بارکزۍ وایي ، چې له نوموړي سره به د ښځو، خبریالانو او ځوانانو د وضعیت په اړه زیاتې خبرې وشي.
د هغې په خبره دغه راز د طالبانو د حکومت له لوري د نجونو او ښځو پر زدهکړو په ښوونځیو او پوهنتونونو کې لګېدلي بندیزونه هم د دې ناستې مهم ټکي دي.
مدني فعاله راضیه بارکزۍ زیاتوي، چې د ښځو د کار او نورو ډېرو مشکلاتو په اړه چې طالبانو ښځو ته پيدا کړي دي هم په دې ناسته کې خبرې کېږي.