تاند(شنبه، د میزان ۲۷ مه) د طالبانو د انرژۍ او اوبو وزارت وایي چې د شنبې په ورځ یې په کابل کې د نغلو په سیمه کې د ۱۰ میګاواټه لمریزې انرژۍ پروژه پرانستلې ده.
دغه وزارت ویلي چې دا پروژه به په کابل او ننګرهار کې د ۱۰ زرو کورنیو لپاره بریښنا برابره کړي.
د طالبانو د انرژۍ او اوبو وزارت چارواکو ویلي چې دا پروژه د «ګرین ایتیت پاور» شرکت له خوا د ۷.۶ میلیون ډالرو په لګښت عملي شوې ده.
د طالبانو د انرژۍ او اوبو وزیر عبداللطیف منصور، د دې پروژې د پرانستلو په مراسمو کې وویل چې د دې وزارت اصلي تمرکز له داخلي سرچینو څخه د بریښنا تولید دی.
هغه زیاته کړه چې وزارت یې پلان لري چې په ډېرو ولایتونو کې د نوي کیدونکي انرژۍ پروژې پلي کړي.