تاند (یکشنبه، د میزان ۲۸ مه) د کرکټ نړیوالې شورا تر چتر لاندې د ښځو د شل اوریز نړیوال جام په پایلوبه کې به نن د جنوبي افریقا او نیوزیلنډ لوبډلې مخامخ شي.
دا پایلوبه به د کابل پر وخت ماښام ۶:۳۰ نیمې بجې د متحده عربي اماراتو د دوبۍ په لوبغالي کې پیل شي.
د نیوزیلنډ لوبډلې په نیمه پایلوبه کې ویسټ اینډیز ته ماتې ورکړه او جنوبي افریقا بیا له اسټرالیا نیمه پایلوبه وګټله.
تر دې دمه د جنوبي افریقا او نیوزیلنډ ښځینه ملي لوبډلو د شل اوریز نړیوال جام اتلولي نه ده ګټلې.
تر دې وړاندې د نیوزیلنډ ملي لوبډلې دوه ځلې د نړیوال جام پایلوبې بایللې وې او جنوبي افریقا بیا تېرکال له اسټرالیا په پایلوبه کې ماتې وخوړه.
دغه شل اوریز نړیوال جام د اکټوبر په ۳یمه نېټه د لسو هېوادونو ترمنځ پیل شو او تر دې دمه پکې ۲۲ سیالۍ ترسره شوي دي.
د ویلو ده چې د یاد نړیوال جام تر پیل وړاندې د کرکټ نړیوالې شورا ویلي وو چې دا ځل به د ښځینه نړیوال جام امتیازات هم د نارینوو په څېر وي او ګټونکې لوبډلې ته به دوه اعشاریه ۳۴ میلیونه او دویم مقام ګټونکې لوبډلې ته به ۱ اعشاریه ۱۷ میلیونه امریکايي ډالر ورکوي.