تاند ( چهارشنبه د میزان ۱۸مه) د پښتون ژغورنې غورځنګ مشر منظور پښتین وايي، په خیبر کې د دوی پر راټولو شویو کسانو د پاکستاني پوځیانو له خوا برید شوی دی.
نوموړي په خپله ایکس پاڼه لیکلي، چې پاکستاني پوځ د دوی پر پلویانو د تېرې شپې راهیسې ډزې او بریدونه پیل کړي دي.
پښتین زیاته کړې، چې په سیمه کې انټرنېټ بند دی، چې له کبله يې د جرګې له تنظیموونکو سره اړیکې پرې شوې دي.
هغه یوځل بیا په ټينګار سره ویلي، چې د جرګې مخنیوی ناشونی دی او ویلي یې دي، چې د پاکستاني پوځ له زور زیاتي سره سره به دا جرګه ترسره کېږي.
د جمعې ورځ ۱۱م د اکتوبر د پښتون ژغورنې غورځنګ د “پښتنو قومي عدالت” په نوم لویه جرګه رابللې او وروستۍ چمتووالی ورته نیسي.
دا په داسې حال کې ده، چې د پاکستان حکومت د تېرې یکشنبې په ورځ په یوه رسمي اعلان کې پر پښتون ژغورنې غورځنګ بندیز ولګاوه او د دې غورځنګ فعالیتونه يې د پاکستان د امنیت لپاره ګواښ وبلل.
له همدې سره هم مهاله منظور پښتین ویلي، د پاکستان حکومت د پښتون ژغورنې غورځنګ د مشرانو او تنظیموونکو په ګډون له ۲۰۰ ډېر کسان نیولي دي.