تاند ( سه شنبه، د میزان ۱۰مه) د پاکستان یوې محکمې پرون دوشنبه له زندان څخه په ضمانت د عمران خان او د هغه د مېرمنې بشرا د خوشې کېدو غوښتنه رد کړه.
دا خبره د عمران خان مدافع وکیل رسنیو ته کړې ده.
عمران خان له ۲۰۲۲م کال راهیسې چې د پاکستان په پارلمان کې د نه باور رایې له لارې له دندې ګوښه شو، په ۱۵۰ قضیو محکوم شوی دی.
هغه وخت په پارلمان کې د عمران خان ګڼو متحدینو له هغه مخ واړوه او نوموړی یې زندان ته کړ.
عمران خان د پاکستان پوځ او خپل اصلي سیال، اوسنی صدراعظم شهباز شریف تورنوي چې د امریکا د یوې دسیسې پر اساس یې د ده حکومت مات کړ.
خو شهباز شریف او امریکا بیا دا ادعا رد کړې ده.