تاند (چهارشنبه، د تلې/ میزان ۲۹ مه) د راپورونو له مخې، یو روسی سوداګر غواړي چې د کندهار ولایت تر ۵ زره ټنو پورې انار د روسیې، ازبکستان، قزاقستان، جاپان او جنوبي کوریا په ګډون نړیوالو بازارونو ته صادر کړي.
دغه سوداګر چې په لومړي ځل کندهار ته تللی، ویلي چې د دغه ولایت انار یې د لوړ کیفیت او له کیمیاوي موادو د پاکوالي له امله خوښ شوي دي.
د هغه په وینا، د کندهار د انارو ځانګړي خوند په نړیوالو بازارونو کې د دې مېوې غوښتنه زیاته کړې او له همدې امله بېلابېلو هېوادونو ته د صادراتو د پراختیا فرصتونه رامنځته شوي دي.
هغه ویلي: «پلان لرم چې تر ۵ زره ټنو پورې انار د ځمکې له لارې ازبکستان، روسیې او قزاقستان ته ولېږم، چې په پای کې به یې یوه برخه د جاپان او جنوبي کوریا بازارونو ته هم ورسېږي.»
د انارو سوداګر د صادراتو د اسانتیاوو غوښتنه کوي
د کندهار د انارو بڼوالو او سوداګرو له چارواکو غوښتي چې د سوداګرۍ لارې ورته اسانه کړي او د نړیوالو معیارونو له مخې د انارو د بستهبندۍ د مرکزونو د جوړولو ملاتړ وکړي.
دوی ویلي، د کندهار انار ته په بهرنیو بازارونو کې د پام وړ تقاضا شته، خو د بستهبندۍ د مناشبو مرکزونو نشتوالی د دې سبب شوی چې صادرونکي له رامنځته شویو فرصتونو څخه ښه ګټه وانخلي.
بڼوالو او سوداګرو همداراز له چارواکو غوښتي چې بهرنیو شرکتونو ته د افغانستان د مېوو په سکتور کې د پانګونې لپاره مناسب شرایط برابر کړي.
د انارو د صادرولو لپاره د ځمکنیو او هوايي لارو هڅې
په همدې حال کې، د کندهار د سوداګرۍ او پانګونې خونې مشر ویلي چې هڅې روانې دي څو د دغه ولایت انار د ځمکې او هوا له لارې بهرنیو بازارونو ته ولېږدول شي.
نوموړي له اړوندو ادارو غوښتي چې له صادرونکو سره زیاته همکاري وکړي، د لېږد پر وړاندې شته ستونزې حل کړي او نړیوالو بازارونو ته د کندهار کرنیزو محصولاتو ته لار هواره کړي.
د کندهار انار د افغانستان له مهمو کرنیزو محصولاتو څخه دي او سوداګر تمه لري چې د بستهبندۍ د اسانتیاوو، د لېږد د لارو د ښه کېدو او د بهرنیو پانګونو په مرسته به یې صادرات نور هم پراخ شي.