تاند (یکشنبه، د تلې/ میزان ۲۶ مه) د ازبکستان د روغتیا وزارت چارواکو او په افغانستان کې د یونیسف استازي په یوه ګډه غونډه کې افغانستان ته د درملو د رسولو د اسانتیاوو پر برابرولو ټینګار کړی دی.
دا په داسې حال کې ده چې په افغانستان کې د درملو د بیو بېسارې لوړېدو او د درملو کمښت، ناروغانو ته د روغتیايي خدمتونه ستونزمن کړي دي.
د افغانستان او پاکستان ترمنځ د لارو تړل کېدو او له پاکستان څخه د درملو پر وارداتو بندیز، په افغانستان کې د درملو د کمښت او د بیو د لوړېدو سبب شوی دی. له افغانستان سره د نړیوالو مرستو کمېدو هم دغه ستونزه نوره پراخه کړې ده.
په افغانستان کې د یونیسف استازي تاجالدین اویواله، د ازبکستان د روغتیا وزارت اړوند د طبي صنعت او درمل جوړونې د پراختیا ادارې له مسوولانو سره په کتنه کې، د لوړ کیفیت درملو د برابرولو او افغانانو ته د ازبکستان د درملو د لاسرسي په اړه خبرې کړې دي.
د افغانستان او پاکستان ترمنځ د لارو له تړل کېدو مخکې، چې د تېر میلادي کال په اکتوبر کې وشول، د افغانستان له ۷۰ سلنې ډېر اړین درمل له پاکستانه واردېدل. د دغو وارداتو درېدو د هېواد د درملو بازار له جدي ستونزو سره مخ کړی دی.
په دې وروستیو کې د کندهار، روزګان، زابل او هلمند ځايي سرچینو هم راپور ورکړی چې د روغتیايي خدمتونو او طبي وسایلو کمښت ناروغان له جدي ستونزو سره مخ کړي دي.