تاند( یکشنبه ـ د میزان ۱ ) په پاکستان کې د عمران خان د پلویانو ناسته پای ته ورسېده.
دا ناسته د تحریک انصاف ګوند له لوري په لاهور کې د پخواني صدراعظم عمران خان د خوشې کېدو په پار په لاره اچول شوې وه.
د تحریک انصاف ګوند مشر ګوهرعلي خان پرون د سپتمبر۲۱مه ویلي، له حکومت سره یې په ټاکلو شرایطو ناسته پای ته ورسوله.
نوموړي د دې شرایطو په اړه نه دي ویلي، چې کوم او څه ډول دي، خو د پېښور په ګډون د پاکستان له ګڼوښارونو زرګونه خلک له تېرې ورځې راهیسې لاهور ته روان وو.
د پاکستاني رسنیو د راپورونو پر بنسټ، که څه هم دې ناستې ته ډېر خلک ورغلي وو، خو د دې هېواد د اطلاعاتو او نشراتو وزیر ویلي چې تحریک انصاف د خپلو پلویانو په راټولولوکې پاتې راغلی دی.
د یادونې ده چې د عمران خان پلویانو او د تحریک انصاف د ګوند لارویانو له دې وړاندې هم د هغه د خوشې کېدو په پار وړاندې ناستې او لاریونونه ترسره کړي دي.