تاند(شنبه، د سنبلې ۲۴ مه) د ټولګټو وزارت د ریللارو مرستیال رييس بخت الرحمن شرافت هرات ولایت ته د سفر په ترڅ کې د هرات خواف د رېللارې د څلورمې برخې د لومړۍ برخې کارونه ولیدل.
د ټولګټو وزارت ویاند محمد اشرف حق شناس وویل، د دې سفر په ترڅ کې، شرافت چارواکو او تخنیکي ټیمونو ته مشوره ورکړه چې پروژه په جدي ډول وڅاري.
هغه زیاته کړه: “اوس مهال د دې پروژې کارونه ۵۶ سلنه بشپړ شوي دي.”
د روان کال په اپریل میاشت کې، د افغانستان د ریللارې ادارې له روسي شرکت “ګاما” سره د خواف – هرات د پټلۍ د څلورمې برخې د دوهم فاز تړون لاسلیک کړ.
د خواف هرات د پټلۍ دا برخه ۴۷ کیلو متره اوږدوالی لري او د افغانستان او ایران تر منځ د خواف – هرات د ریللارې د پروژې وروستۍ برخه ده.
د خواف – هرات ریل پټلۍ د ختیځ – لویدیځ نړیوال دهلیز برخه ده او د ختیځې او لوېدیځې اسیا د پنځو هیوادونو ترمینځ اقتصادي اړیکې ګړندۍ کوي.
تمه کیږي چې دا ریللار به ایران او ترکیه د افغانستان د واخان له لارې له چیت سره ونښلوي.