تاند( پنج شنبه ـ د سنبلې ۲۲مه) د خوړو نړیوال پروګرام “WFP” په یوه راپور کې ویلي، چې د بودیجې د کمښت له امله نه دي توانېدلي چې له مې تر اکتوبر میاشتې پورې څه باندې ۱۱ میلیونه اړمنو افغانانو سره مرسته وکړي.
په راپور کې راغلي چې افغانستان کې د مرستو په موخه د راتلونکو شپږو میاشتو لپاره ۶۷۷ میلیونه ډالرو ته اړتیا لري چې اړمن افغانان پرې وپالي.
تېره ورځ د ملګرو ملتونو د بشري چارو د همغږۍ دفتر (OCHA) هم له نړیوالې ټولنې څخه په افغانستان کې د ژمي په موسم کې د اړمنو افغانانو د اړتیا لپاره د ۶۰۳ میلیون ډالره د مرستې غوښتنه وکړه.
اوچا د افغانستان ۱۷۱ ولسوالۍ د لوړ لومړیتوب لرونکي او ۲۷۷ ولسوالۍ په منځنۍ کچه مرستو ته اړمنې سیمې بللي او ټینګار یې وکړ چې۱۰۴ میلیون ډالره تر ژمي مخکې په بېړني ډول پکار دي چې د ژمي تر رارسیدو وړاندې هغو سیمو ته مرستې ورسوي چې په ژمي کې د مرستو رسول ورته ستونزمن دي.
ملګري ملتونه وایي، په افغانستان کې شاوخوا ۲۴ میلیونه خلک بشري مرستو ته اړتیا لري، خو د اړتیاوو له زیاتېدو سره سره، د مرستو د کمېدو په اړه جدي اندېښنه څرګندوي او وايي چې د اړتیا وړ بودیجې یوازې په سلو کې څه کم ۲۵ سلنه یې ترلاسه کړې ده.