تاند (چهارشنبه، د سنبلې ۲۰ مه) د ترکمنستان ولسمشر نن د ټاپي او څو نورو پروژو په پرانستونکو مرامسو کې وویل، د دغو مهمو پروژو تطبیق نه یوازې د ترکمنستان او افغانستان د ګټو لپاره، بلکې د سیمې د ګټو لپاره هم مهم دی.
قربان قُلي بیردي محمدوف وویل:«نن د دواړو هیوادونو لپاره تاریخي ورځ ده او د دواړو هیوادونو ترمنځ په اړیکو کې به یوه نوی باب پرانیستل شي.»
هغه زیاته کړه چې د افغانستان او ترکمنستان تر منځ اړیکې تاریخي دي، متقابل درناوی، مساوات، ورورولي او ښه ګاونډیتوب د دواړو هیوادونو تر منځ یو مهم مثال دی او په راتلونکې کې به دا اړیکې نورې هم پراخې شي، او همداراز د ترانسپورت، مخابراتو، انرژۍ او بریښنا په برخو کې د دواړو هیوادونو همکاري د افغانستان لپاره ګټوره ده او د دواړو هیوادونو ترمنځ د یوه نوي باب د پرانیستلو او حقیقي دوستۍ یوه بیلګه ده.
د هغه په وینا، د دوی د پالیسۍ مهمه برخه دا ده چې په اقتصادي، سیاسي او ډیپلوماتیکو برخو کې د افغانستان له خلکو سره خپلې همکارۍ ته دوام ورکړي.
د افغانستان او ترکمنستان د ګډو پروژو د پرانستنې مراسم د ترکمنستان د ماري په سلیم چشمه سیمه کې جوړ شول.
د ترکمنستان دولتمشر وویل چې یادې پروژې به د افغانستان په اقتصادي پراختیا، د صنعت او ټولنیز ژوند په وده مثبته اغیزه ولري، ۱۲۰۰۰ افغانانو ته به د کار فرصتونه برابر کړي، هر کال به دا پروژې د افغانستان لپاره شاوخوا یو میلیارد ډالره عاید په برخه کړي، او د دې ترڅنګ چې منځنۍ اسیا او جنوبي اسیا به سره ونښلوي، اروپا ته به د افغانستان او سیمې د محصولاتو د صادراتو لار هواره شي.
د ټاپی سیمه ییز پایپ لاین، چې د ترکمنستان ګاز د افغانستان له لارې پاکستان او هند ته لیږدوی، ۱،۸۲۱ کیلومتره اوږدوالی لري، په کال کې د ۳۳ ملیارد مکعب متره ګاز د لېږدولو ظرفیت لري. د دې نللکي په وسیله د ګاز د انتقال له درکه به افغانستان د کال ۴۰۰ میلیون ډالره حق العبور ترلاسه کړي.
د دوی له لوري بله پروژه، چې نن پرانیستل شوه، له تورغونډۍ څخه تر صنوبر پورې ۲۲ کیلومتره رېللاره ده.
ملا محمد حسن اخوند د دغو پروژو په پرتیستغونډه کې وویل، «د دغو پروژو پرانیستل د ترکمنستان د ملي مشر او د ترکمنستان د نورو چارواکو ښه نیت او هوښیاره پالیسي ښیي، او دا پروژې به د افغانستان او ترکمنستان ترمنځ دوستي زیاته کړي او د دواړو هېوادونو خلکو ته به لویې ګټې ورسوي.»
د طالبانو ريیس الوزرا د خپل حکومت اړوندو چارواکو ته لارښوونه وکړه چې د دغو پروژو د بشپړولو لپاره په صداقت، اخلاص او صبر کار وکړي.