تاند(جمعه، د سنبلې ۲۶ مه) د خیبرپښتونخوا اعلي وزیر او د تحریک انصاف ګوند یوه جګپوړي غړي “علي امین ګنډاپور” د سولې په اړه د طالبانو له حکومت سره د خبرو لپاره د پاکستان له حکومت څخه اجازه غوښتې ده.
ګنډاپور له قومي مشرانو او د ګوندونو له استازو سره په کتنه کې ویلي، که د پاکستان حکومت اجازه ور نه کړي، نو د اعلي وزیر په توګه به قبایلي مشران په له طالبانو سره خبرو ته ولېږي.
ده په دې باندې په ټينګار سره چې په خیبرپښتونخوا کې د اورپکۍ د له منځه وړلو لپاره مشخصې تګلارې او مهالوېش ته اړتيا ده، څرګنده کړه: «په دې ایالت کې سوله په يوه سوله ييز افغانستان پورې تړلې ده.»
د تحریک انصاف ګوند دغه لوړپوړي غړي په دوام کې وویل چې ډېر ژر به په دې اړه د ایالت د عالي کمېټې غونډه راوبولي او له طالبانو سره به د سولې خبرو ته کېني.
د خيبر پښتونخوا اعلي وزیر يادونه وکړه چې د پاکستان حکومت او پوځ دې د امنيتي ستونزو په اړه له قبايلي ولس سره مشوره وکړي او د ستونزو د هواري لپاره دې اقدام وکړي.
ګنډاپور همداراز ټینګار وکړ: د خلکو له ملاتړ پرته هیڅ جګړه نه شي ګټل کیدای. حکومت باید د دغه ایالت له خلکو سره په همغږۍ د وسله والو پر ضد پوځي عملیات وکړي.
د خیبرپښتونخوا اعلي وزیر تر دې وړاندې په خپله صوبه کې د پاکستان د پوځ له لوري د نویو عملیاتو له کېدو سره مخالفت کړی و.
د خیبرپښتونخوا اکثره سیاستوال او مخور د پاکستان د پوځ له عملیاتو سره مخالفت کوي او وايي چې د ضرب عضب په نوم د عملیاتو له کبله لا هم زرګونه قبایل بې کوره دي.
دا خو خپله سم طالب دی، خو چې يوه توره لنګوټۍ پيدا او پر سر يې کړي. له رواني پلوه خو له طالب زيات افراطي ښکاري.