تاند (دوشنبه، د سرطان 8 مه) د طالبانو د بغلان ولایت د اطلاعاتو او کلتور ریاست وايي چې په دغه ولایت کې د تاریخي سیمو او د سیلونو له کبله زیانمن شویو ساحو د سروې په ترڅ کې ۸ نوې تاریخي سیمې کشف شوي دي.
دغه ریاست نن په یوه خبرپاڼه کې ویلي چې دا ۸ ساحې، چې سمڅې او غونډۍ پکې شاملې دي، د بغلان په بُرکې، نهرین، ده صلاح، پُل حصار، مرکزي بغلان او دهنه غوري ولسوالیو کې کشف شوي دي.
د خبرپاڼې پر اساس، دا لرغوني اثار د باختري دورې او ځینې یې د کوشاني دورې دي.
د سږ کال د ثور (مې) د میاشتې د سختو بارانونو او سیلونو له کبله په بغلان ولایت کې تر ۳۰۰ ډېر کسان مړه او سلګونه کورونه ویجاړ شول.