تاند ( شنبه، د سرطان ۲۳ مه) با خبره سرچینو تاند ته ویلي، چې د طالبانو د استخباراتو ادارې په ننګرهار کې یو شمېر ځوانان د پښتون ژغورنې غورځنګ د مخکښ غړي شهید ګیله من وزیر د غایبانه جنازې د پلانولو په تور بندیان کړي.

د سرچینو د معلوماتو له مخې، عبیدالله فاروقي او ډاکټر محمود له دغو ځوانانو څخه دي.

د دغو ځوانانو پر فیسبوک پاڼو لیدل کیږي، چې د ګیله من وزیر د غایبانه جنازې د غوښتنې او د هغه په مړینه د غمرازۍ له امله پښېماني ښودل شوې او په ځینو پوسټونو کې نوموړي ته سبکاوی هم شوی.

د دغو ځوانانو یو شمېر ملګرو ویلي، چې دوی طالبانو بندیان کړي او له اکونټونو یې ناوړه استفاده کړې ده.

معلومه نه ده، چې دوی اوس هم بندیان دي که له بنده خوشې شوي.

خلکو په دې اړه توند غبرګونونه ښودلي او ویلي، چې طالبان د داسې ملي فکره ځوانانو په نیولو، شکنجه کولو او د ټولنیزو رسنیو پر پروفایلونو یې د خپل بیرغ له ځړولو سره ملي فکر او ارمانونه له منځه وړلی او د ځان تابع کولای نه شي.

طالبانو په دې اړه څه نه دي ویلي.

د دوی رژیم له څو ورځو راهیسې د ګیله من وزیر په مړینه د نه غمرازۍ او د هغه خواخوږو سره د ناوړه چلند له امله توندو نیوکو سره مخ شوي.