تذکره درلودل د هر افغان قانوني حق او مکلفیت دی . د افغانستان د دولت دا اقدام د ستایلو وړ دی. د تذکرې درلودل چې په نورو هېوادونو کې ورته د هویت کارت « Electronic identity card » وایي ، هر انسان ته لازم او ملزوم دی.
د تذکرې په اساس پاسپورتونه اجرا کیږي ، ماشومان ښوونځي او پوهنتون ته داخلېدای شي . لویان او بالغ اتباع مځکه ، کور ، دکان ، باغ ، موټر ، فابریکه او نور ملکیتونه اخیستلی او خرڅولای شي ، په دفترونو کې رسمي کار کولای شي ، لایسنس ، اخیستلای شي .
بنا تذکره درلودل د هر تبعه لپاره ضروري او لازمي ده .
د تذکرې ترڅنګ پاسپورت درلودل هم د هر افغان قانوني حق دی ، چې د هغه په اساس او د قانوني ویزې په ترلاسه کولو سره د نړۍ نورو هېوادونو ته سفر کولای شي . کوم کسان چې په نورو هېوادونو کې تحصیل ، کار ، سوداګري ، سیاحت او ژوند کوي ، باید پاسپورت ولري . د دولت وجیبه او مکلفیت دی ، خپلو اتباعو ته د هېواد دننه د کورنیو چارو وزارت او مربوطه ادارو له خوا او په خارج کې د افغانستان د سفارتونو او قونسلګریو له خوا توزیع کړل شي ، ترڅو افغانان له دې قانوني او نړیوال حق نه په خپل وخت استفاده وکړای شي .