تاند (پنجشنبه، د سرطان ۱۴ مه) د افغانستان لپاره د اسلامي همکاریو سازمان ځانګړي استازي طارق علی بخیت ټینګار کړی، چې د افغانستان د ستونزو د حل لپاره باید پر دغه هېواد د طالبانو له واکمن رژیم سره تعامل وشي.
نوموړي په خپلو تازه څرګندونو کې ویلي، چې افغانستان له ګڼو ستونزو سره مخامخ دی او دا ستونزې د ستراتیژیکو همکاریو په چوکاټ کې له واکمن طالب رژیم سره د تعامل له لارې حلیدای شي.
تر دې مخکې د اسلامي همکاریو سازمان سرمنشي هم ورته ټینګار کړی و.
یاد شوي سازمان د دې تر څنګ بیا- بیا د طالبانو له رژیم څخه د نجونو پر زده کړو د بندیزونو د پای ته رسولو په ګډون ګڼې نورې اصلاحي غوښتنې هم کړي، خو طالب چارواکو ورته غاړه نه ده ایښې.
د طالبانو کندهار مېشتي عمومي مشر ملا هبت الله اخندزاده خو افغانستان ته د اسلامي همکاریو سازمان له راغلي پلاوي سره له لیدنې هم ډډه کړې وه.
طالب رژیم تل دوی سره پر نړیوال تعامل ټینګار لري، خو د افغانانو دې نیوکې سره مخ دی چې خپله دغه رژیم افغانانو سره له تعامل او مشروعیت موندلو پرته بهرنیانو سره د تعامل هڅه کوي؛ هغه څه چې د دوی په باور طالبانو ته به یې تر لاسه کول ستونزمن او د ترلاسه کولو په صورت کې هم بې پایښته وي.