تاند (شنبه، د سرطان ۹ مه) امریکا غږ یا وي او ای رسنۍ په یوه راپور کې ویلي، چې د طالبانو د رژیم له بندیز سره- سره د افغانستان په ۲۹ ولایتونو کې اوس هم کروندګر په پټه د کوکنارو کرلو ته دوام ورکوي.
سرچینې بدخشان، هلمند، ننګرهار او هرات هغه ولایتونه یاد کړي چې لا هم کروندګر پکې د کوکنارو کښت ته دوام ورکوي.
د وي او ای په راپور کې د طالبانو د یوه مقام عبدالحق اخوند زاده له قوله ویل شوي، چې د نشه یي توکیو کر کیله دوی ته جدي ستونزه نه ده او تر ډېره یې په حلولو توانیدلي.
د طالبانو د کورنیو چارو وزارت ویلي، په تېرو شپږو میاشتو کې یې پولیسو پر ۳۶۰۰ هیکتاره ځمکې د کوکنارو د فصل ضد ۱۵۰۰۰ عملیات کړي او په کښت د بندیز په خلاف ورزۍ يې په زرګونو کسان نیولي دي.
څو میاشتې مخکې په بدخشان کې د کوکنارو د فصل اړولو پر مهال د طالبانو او کروندګرو نښته کې یو شمېر کروندګر وهم وژل شول، چې د سختو اعتراضونو سبب شو.
د طالبانو رژیم او ملاتړي یې د کوکنارو پر فصل بندیز د دغه رژیم یوه لویه لاسته راوړنه ګڼي، خو منتقدان یې باور لري چې د دغه بندیز له امله افغان کروندګر سخت زیانمن شوي ځکه بدیل معیشت نه دی ورته برابر شوی او پر دغه کښت یې بندیز لګول شوی.