تاند (پنجشنبه، د سرطان ۷ مه) د ایران د بهرنیو چارو مرستیال وزیر رسول موسوي د طالبانو سیاستونه «ډېر پاخه او محاسبه شوي» وبلل.
ښاغلي موسوي پر خپله ایکسپاڼه لیکلي: “که تاسو یې منئ یا یې نه منئ، دوی امریکا ته هم په میدان کې او هم په دوحه کې ماتې ورکړه.”
داسي ښکاري چې د ښاغلي موسوي مخاطبان د طالبانو مخالفان وي.
ده همداراز لیکلي: «دا حقیقت چې تاسو د طالبانو د تګلارو هرکلی نه کوئ، په دې حقیقت باندې هیڅ اغیز نه لري چې د طالبانو د پرېکړو او سیاستونو مرکزيت عاقلانه دی.»
رسول موسوي، چې د ایران د بهرنیو چارو په وزارت کې د جنوبي اسیا د عمومي رییس په توګه هم دنده لري، د یوناما د مشرې دا خبره چې طالبان له غرونو او جګړو څخه راغلي د طالبانو په پېژندلو او درک کولو کې لویه تېروتنه بللې ده.
روزا اوتنبایوا په نیویارک کې په یوه خبري کنفرانس کې د د دوحې په غونډه کې د ښځو له ګډون سره د طالبانو د مخالفت په باب د یوې بوښتنې په ځواب کې وویل: «طالبان زموږ او ستاسو په څېر نه دي. طالبان له غرونو او جګړې څخه راغلي او دا اسانه کار نه دی چې هغوی په داسې کسانو بدل کړئ چې د خبرو مېز ته کښېني او زموږ اصول ومني.
سره له دې چې له طالبانو سره د ایران داړیکو له ښه والي انکار نه شي کېدای خو ایراني او پاکستاني چارواکو د طالبانو په اړه په ځلونو ضد و نقیض څرګندونې کوي.