تاند (پنجشنبه، د سرطان ۷ که) د ملګرو ملتونو امنیت شورا په دوهم ځل د طالبانو د کورنیو چارو وزیر سراج الدین حقاني ته چې د دغه سازمان له خوا په تور لیست کې شامل دی، متحده عربي اماراتو ته د سفر اجازه ورکړه.
امنیت شورا په یوه خبرپاڼه کې لیکلي چې دا معافیت د سرطان د میاشتې له لومړۍ څخه تر پنځمې نیټې پورې د “امنیت او پخلاینې په غونډه” کې د حقاني د ګډون لپاره ورکړل شوی و.
تر اوسه طالبانو او متحده عربي اماراتو د ښاغلي حقاني د سفر په اړه څه نه دي ویلي.
تر دې مخکې د ملګروملتو امنیت شورا سراج الدین حقاني او د طالبانو درې نورو جګپوړو چارواکو ته اجازه ورکړې وه چې د حج په مراسمو کې د ګډون لپاره سعودي عربستان ته ولاړ شي.
دا متحده عربي اماراتو ته د سراج الدین حقاني دوهم سفر دی. هغه د جوزا په میاشت کې هم ابوظبۍ ته هم سفر وکړ او په ابوظبۍ کې یې د متحده عربي اماراتو له صدراعظم محمد بن زاید آل نهیان سره وکتل.
دغه سفر پر امريکا نيوکې راپارولي چې په تروريستي فعاليتونو کې د لاس لرلو له امله يې د حقاني د نيولو لپاره لس ميليونه ډالره جايزه ټاکلې ده.
د امریکا د بهرنیو چارو وزارت له هېوادونو غوښتي چې د طالبانو پر وړاندې نړیوال بندیزونه رعایت کړي او د امنیت شورا د بندیزونو کمېټې له مقرراتو سره سم معافیت ترلاسه کړي.
په وروستیو کې د نرم دریځ د لرلو له کبله د حقاني په اړه د نړیوالو او ډېرو افغانانو نظرونه نرم شوي دي. او ډېر ورته هیله لري چې ګوندي د نجونو د ښوونځیو د پرانیستلو په شمول به د طالبانو د مشرتابه په دریځونو کې د بدلون راوستلو په برخه کې مهم رول ولوبوي.