تاند (شنبه، د سرطان دوهمه) د خیبرپښتونخوا په کورمه کې د جمعې په ورځ د امنیتي ځواکونو یوه کاروان ته څېرمه د سړک د غاړې په بمي چاودنه کې پنځه پوځیان ووژل شول او دوه نور ټپیان شول.
چارواکي وايي، دا په دې ناکراره سیمه کې پر امنیتي ځواکونو د بریدونو د زیاتوالي یوه بله نښه ده.
په سیمه کې وروستی برید په کورمې ولسوالۍ کې شوی چې پخوا یوه قبایلي ایجنسي وه او اوس په خیبرپښتونخوا ایالت پورې تړلې ده.
د پاکستان پوځ په یوه بیان کې ویلي چې په سیمه کې د لټون عملیات روان دي.
تراوسه د دې برید مسوولیت چا په غاړه نه دی اخیستی. خو احتمال شته چې دا حمله پاکستاني طالبانو، چې د تحریک طالبان پاکستان یا TTP په نوم پیژندل کیږي، کړې وي.
په افغانستان کې د طالبانو له واک ته رسیدو وروسته د ټي ټي پي غړي تشویق شوي چې دوی هم که قربانۍ ورکړي د اوسني پاکستان تر کنټرول لاندې پښتني سیمو کې د افغان طالبانو په شان اسلامي حکومت جوړولی شی.
په همدې حال کې چارواکو د جمعې په ورځ وویل چې مشکوکو بېلتون غوښتونکو د بلوچستان ایالت له ناکراره سیمې هرنايي څخه لږ تر لږه لس کسان تښتولي. ځايي خلک وايي چې تښتړول شوي کسان پنجابیان دي او د بلوچستان د ازادۍ پوځ وايي چې دا کسان یې نیولي او له هغوی څخه تحقیقات کوي چې ایا عام خلک دي او که استخباراتي کسان.