تاند (شنبه، د جوزا ۱۲ مه) د افغانستان او واکمن رژیم په اړه یې د روسیې د ضدو نقیضو دریځونو په دوام، نن د افغانستان لپاره د دغه هېواد د ولسمشر ځانګړي استازي ضمیر کابلوف ویلي، چې روسیې ته پر افغانستان د طالبانو « قاطع واکمني» ارزښتناکه ده.
د کابلوف په وینا، د افغانستان هر ډول تجزیه به تر هر چا زیات سیمې ته بدې پایلې ولري.
هغه نه دي ویلي، چې د افغانستان د تجزیې خبره له کومه شوې او ولې یې داسې بحث مطرح کړی؟
روسیه له پخوا څخه په افغانستان کې د تجزیه غوښتنې په دسیسو تورنه شوې وه او په خاص ډول یې د دې اجنډا له تعقیبونکې شمال ټلوالې سره د څرګند ملاتړ په اړه توندې نیوکې شوې وې.
پرون د روسیې دفاع وزیر په قزاقستان کې د یوې سیمه ییزې غونډې پر مهال ادعا وکړه، چې د افغانستان خاوره د منځنۍ اسیا د بې ثباتۍ اصلي سرچینه ده.
په وروستیو کې روسي او د نورو ګڼو هېوادونو چارواکي د افغانستان او واکمن طالب رژیم په اړه یې ورته ضدو نقیضې څرګندونې کوي.
څارونکي باور لري، چې ټول هېوادونه د خپلو لوبو او ګټو په اساس طالب رژیم او مخالفانو سره یې مخته ځي، دواړه لوري په ښکاره او پټه پالي، خو په واقعیت کې یو هېواد هم د هیڅ کومې ډلې او افغانستان په اړه ښه نیت نه لري.
د دوی په باور، طالبان او مخالفان یې د خپلو ګټو په محور څرخي او د افغانستان د راتلونکي په اړه د سیمه ییزو او نړیوالو لوبو څخه یا ناخبره دي، یا یې د مخنیوي او ورسره د نه همکارۍ په برخه کې بې تفاوته دي.