تاند (شنبه، د جوزا ۱۲ مه) د ننګرهار د مومند ولسوالۍ اړوند باسول ساحه کی نن سهار اووه نیمې بجې یوه کښتۍ چې مېرمنې او ماشومان هم په کې سپاره وو، سیند کې ډوبه شوې ده.
د ځایي طالب چارواکو د معلوماتو له مخې، یادې کښتۍ کې ۲۵ تنه سپاره وو، چې ۲۰ تنو ترې ژوند بایللی او پنځه نور ژوندي ژغورل شوي دي.
د چارواکو په وینا تر دا مهاله د پنځو شهیدانو جسدونه پیدا شوي او د نورو جسدونو د موندلو هڅې جریان لري.
د ځایي چارواکو په خبره، په مړو کې مېرمنې او ماشومان هم شامل دي.
په مومند دره ولسوالۍ کې د مواصلاتي ستونزو له امله له ډېره وخته ځایي خلک د کښتۍ په وسیله تګ راتګ کوي.
تر دې مخکې هم دغو کښتو یو شمېر کسان ډوب کړي وو، خو دا پېښه تر ټولو خونړۍ ګڼل شوې ده.
د افغانستان هیڅ حکومت مواصلاتي لارو ته پام ندی کړی، د کابل هر حکومت نالایقه او بې کفایته دی. که اسلامي امارت واقعا خدمت کولای شي، نو د افغانستان ټولې لارې سرکونه دې پاخه او پراخه او جوړ کړي.
د افغانستان پخواني حکومتونه زمونږ د سیمې د هېوادونو په شان د اقتصادي توان له امله کمزوري وو، له بلې خوا دا نژدې 50 کاله زمونږ د هېواد خلکو ته دا دنده سپارل شوې وه ، چې اوبو بندونه ، پلونه ، ښوونځي ، دولتي او شخصي فابریکې ، د برق او برښنا پروژې ، روغتونونه ، لويې لارې او سرکونه وران کړي . ولس هم په ډېر صداقت او ایماندارې سره خپله دنده سرته ورسوله . نژدې ټول اقتصادي تاسیسات یې ویجاړ کړل ، د پخوانیو دولتونو نظامي تجهیزات لکه ټانکونه ، شوبلې ، توپونه ، الوتکې ، د لونا ، سکات ، بې ام 40 او نور توغندي ويشتونکې دستګاوې یې کباړ او له پنجابه ځار کړې .
بنا زمونږ هېوادوال نن د خپلو کړنو ثمره اخلي ، ښوونځي تړلي دي ، لارې اوپلونه ويجاړ ، روغتونونه مو له داکترانو او نرسانو نه تش ، او تقریبا ټول مسلکي هېوادوال له هېواد نه په وتو دي .
اوس د پنجابي داعشیانو ترڅنګ ، د احمد مسعود په مشرۍ یوه نوې تروریستي ډله د پنجاب او د سیمې د نورو هېوادونو له خوا ګمارل شوېده ، ترڅو د وروستیو شلو کلونو یوه نیمه اقتصادي موسسه که پاته وي ، هغه هم له منځه یوسي .
افغانستانه الله د مل شه .