تاند (پنجشنبه، د جوزا ۱۰ مه) د ننګرهار د یوه وژل شوي ډاکټر جسد د لغمان په قرغیو ولسوالۍ کې موندل شوی.
سیمه ییزو سرچینو ویلي، انسان تښتوونکو د ضیا الرحمن په نوم دغه ډاکتر له تښتولو وروسته وژلی دی.
سرچینو زیاته کړه، چې نوموړی د ننګرهار له بهسودو ولسوالۍ تښتول شوی و.
د سرچینو په وینا، د دغه ډاکتر په بدن کې د ربړونې نښې لیدل کېږي؛ خو نوموړی په ډزو وژل شوی دی.
ضیاالرحمان د ننګرهار درهنور ولسوالۍ اصلي اوسېدونکی و او پلار یې د یو ښوونځي مدیر دی.
د ننګرهار لپاره د طالبانو چارواکو په دې اړه څه نه دي ویلي.
د یادونې ده چې پرون هم ناپېژانده کسانو د دغه ولایت له مرکز جلالاباد څخه د یوه سوداګریز مرکز خاوند او صراف تښتولی.
طالبانو ګڼ کسان له تښتونکو بیرته ژغورلي هم دي، خو د څارونکو په باور له اساسي او هر اړخیزو اقداماتو پرته یوازې په امنیتي تدابیرو د جنایي پېښو او جرایمو مخنیوی نا ممکن دی.